Breaking News

కరోనా వైరస్ బారిన పడిన ఓ ప్రభుత్వ వైద్యుడితో బలవంతంగా నైట్ డ్యూటీ....


SATYASHILA TV :

కరోనా పేషెంట్లకు చికిత్స అందించడానికి డాక్టర్లు, నర్సులు, ఇతర వైద్య సిబ్బంది శక్తి వంచన లేకుండా కృషి చేస్తున్నారు. ఈ క్రమంలోనే చాలా మంది డాక్టర్లు కోవిడ్ బారిన పడుతున్నారు. కొద్ది రోజులపాటు హోం ఐసోలేషన్‌లో ఉండి లేదా చికిత్స అనంతరం తిరిగి డ్యూటీలో చేరుతున్నారు. కాగా కరోనా వైరస్ బారిన పడిన ఓ ప్రభుత్వ వైద్యుడితో బలవంతంగా నైట్ డ్యూటీ చేయించడం కలకలం రేపుతోంది. సెప్టెంబర్ 8 రాత్రి జనగామ జిల్లా హాస్పిటల్‌లో ఈ ఘటన చోటు చేసుకుంది. రాత్రి పూట విధులు నిర్వర్తించిన ఈ డాక్టర్ ఎంత మందిని కలిశారు.. వారిలో ఎంత మంది ఇన్ఫెక్షన్ బారిన పడే అవకాశం ఉందని ఆరా తీస్తున్నారు. కోవిడ్ సోకిన డాక్టర్‌కు నైట్ డ్యూటీ వేయడంపై విమర్శలు రావడంతో.. జిల్లా యంత్రాంగం విచారణకు ఆదేశించింది. కరోనా పాజిటివ్‌గా తేలిన డాక్టర్ భార్య జనగామలోని మదర్ అండ్ చైల్డ్ హాస్పిటల్‌లో ఫిజిషియన్‌గా పని చేస్తున్నారు. ఇంతకు ముందు ఆమెతోపాటు ఇతర కుటుంబ సభ్యులు కోవిడ్ బారిన పడ్డారు. దీంతో లక్షణాలేవీ లేకపోయినప్పటికీ కరోనా టెస్టు చేయించుకోగా.. ఆయనకు కూడా పాజిటివ్ అని తేలింది. సెప్టెంబర్ 8న రాత్రి 8 గంటలకు ఆ డాక్టర్ డ్యూటీకి వెళ్లాల్సి ఉండగా.. సాయంత్రం ఐదు గంటలకు కరోనా పాజిటివ్ అని రిపోర్టు వచ్చింది. ఈ విషయాన్ని సీనియర్లకు తెలిపిన డాక్టర్ డ్యూటీకి వెళ్లకుండా క్వారంటైన్లో ఉండాలని నిర్ణయించుకున్నారు. కానీ హాస్పిటల్‌కు చెందిన సీనియర్ ఒకరు... రోస్టర్‌లో నైట్ డ్యూటీకి నీ పేరు ఉంది కాబట్టి రావాలని ఒత్తిడి చేశారు. దీంతో ఏం చేయాలో పాలుపోని ఆ డాక్టర్ ఉద్యోగాన్ని కాపాడుకోవడం కోసం పీపీఈ సూట్ ధరించి డ్యూటీకి వెళ్లాడు. తనకు కోవిడ్ వచ్చినా డ్యూటీకి రావాల్సి వచ్చిందని సహచర డాక్టర్లకు చెప్పగా.. పరిస్థితిని అర్థం చేసుకున్న జిల్లా అధికారులు మరుసటి రోజు నుంచి మరుసటి రోజు నుంచి డ్యూటీకి రావొద్దని సూచించారు. వైద్యులు సహా ఎవరికీ కరోనా సోకినా 17 రోజులు ఐసోలేషన్లో ఉండటం తప్పనిసరని జనగామ డీఎంహెచ్‌వో ఎ.మహేందర్ తెలిపారు. కరోనా సోకిన డాక్టర్ సెప్టెంబర్ 8న రాత్రి డ్యూటీలో ఉన్నప్పుడు ఎవరికీ చికిత్స అందించలేదన్నారు. ఏ పరిస్థితుల్లో ఆ డాక్టర్‌ను డ్యూటీకి రమ్మనాల్సి వచ్చిందో విచారణ జరిపి నివేదిక ఇవ్వాలని జిల్లా వైద్యశాఖ అధికారులను ఆదేశించినట్లు కలెక్టర్ కె.నిఖిల తెలిపారు.