Breaking News

ఫ్లోరైడ్‌ రహిత రాష్ట్రంగా తెలంగాణ.... తాజాగా మంత్రి కేటీఆర్ ట్వీట్


దశబ్దాల నుంచి తెలంగాణ రాష్ట్రాన్ని పట్టి పీడించిన ఫ్లోరైడ్‌ సమస్య పూర్తిగా తొలగిపోయింది. ఫ్లోరైడ్‌ రహిత రాష్ట్రంగా తెలంగాణ గుర్తించబడింది. తెలంగాణతో పాటు ఉత్తరాఖండ్‌, గుజరాత్‌లను కూడా ఫ్లోరైడ్‌ రహిత రాష్ట్రాలుగా గుర్తిస్తూ.. కేంద్ర ప్రభుత్వం పార్లమెంట్‌లో అధికారిక ప్రకటన చేసింది. 2015 ఏప్రిల్‌ 1 నాటికి దేశంలోని పలు రాష్ట్రాల్లో ఫ్లోరైడ్‌ ప్రభావిత, కఠినమైన(ఆర్సెనిక్‌) జలాలు కలిగిన ఆవాసాల వివరాలు, 2020 ఆగస్టు 1 నాటి పరిస్థితులను కేంద్ర తాగునీటి శాఖ వెల్లడించింది.


దీంతో తాజాగా మంత్రి కేటీఆర్ ట్వీట్ చేశారు. మిషన్ భగీరథ వల్లే ఫ్లోరైడ్ రహిత రాష్ట్రంగా తెలంగాణ అవతరించిందని మంత్రి కేటీఆర్ పేర్కొన్నారు. రాష్ట్ర ఐటీ, మున్సిపల్ కేటీఆర్ నాటి, నేటి తెలంగాణ అనే ఓ వీడియోను ట్వీట్ చేశారు. రాష్ర్ట అవతరణకు ముందు ఫ్లోరైడ్ రక్కసితో బాధపడిన కుటుంబాలు నేడు సంతోషం వ్యక్తం చేస్తున్నాయి. మిషన్ భగీరథ ద్వారా సురక్షిత తాగు నీరు అందించడంతో ఫ్లోరైడ్ నుంచి విముక్తి కలిగిందని బాధిత కుటుంబాలు పేర్కొంటున్నారు. ఈ విషయంలో సీఎం కేసీఆర్‌కు రుణపడి ఉంటామని చెబుతున్నారు.

ఒక నాయకుడికి దూరదృష్టి ఉండి సంకల్పం ఉంటే.. మంచి కోసం మిలియన్ల మంది జీవితం మారుతుందని కేటీఆర్ ట్వీట్ చేశారు. తెలంగాణ రాష్ర్టం ఏర్పడటానికి ముందు ఫ్లోరైడ్ ఒక విపత్తుగా ఉండేది. కానీ ఇప్పుడు మిషన్ భగీరథ ఫ్లోరైడ్ సమస్యను విజయవంతంగా తొలగించింది అని, అది సీఎం కేసీఆర్ వల్లే సాధ్యమైందని తెలిపారు