Breaking News

చింతకుంట మండలం బండర్ వల్లి చెక్ డ్యామ్‌ ను సందర్శిన మంత్రి శ్రీనివాస్ గౌడ్


తెలంగాణలో విస్తారంగా కురుస్తున్న వర్షాలకు వాగులు వంకలు పొంగి ప్రవహిస్తున్నాయి. ఈ క్రమంలో మహబూబ్ నగర్ జిల్లా కూడా జల కళను సంతరించుకుంది. కురువు జిల్లాగా పేరుగాంచిన పాలమూరులో జలసిరులు ఎగిసిపడుతున్నాయి. ఈ క్రమంలో మహబూబ్ నగర్ జిల్లాలోని చిన్న చింతకుంట మండలం బండర్ వల్లి చెక్ డ్యామ్‌ వద్ద మంత్రి శ్రీనివాస్ గౌడ్, దేవరకద్ర ఎమ్మెల్యే ఆల వెంకటేశ్వర్ రెడ్డి పర్యటించారు. వాగు నిండుగా పారుతుండటంతో వారు పులకించిపోయారు.

ఆ పులకరింతతో చిన్న పిల్లల్లాగా మారిపోయిన మంత్రి, ఎమ్మెల్యే ఉత్సాహంగా వాగులోకి దిగారు. వేగంగా ప్రవహిస్తున్న నీటిలో నిలబడి అటు ఇటు తిరుగుతూ సందడి చేశారు. ఇద్దరు కలిసి సెల్ఫీలు తీసుకున్నారు. అంతేకాక, జిల్లాలోని ఎగువన కురుస్తున్న భారీ వర్షాలకు కోయిల్ సాగర్ ప్రాజెక్ట్ పూర్తి స్థాయిలో నిండడంతో అన్ని గేట్లను ఎత్తారు. చిన్న చింతకుంట, దేవరకద్ర మండలాల పరిధిలోని ఊకచెట్టు వాగు పొంగి ప్రవహిస్తోంది. ప్రజలు అప్రమత్తంగా ఉండాలని, ముఖ్యంగా బండ్రవల్లి చెక్ డ్యామ్ దగ్గర నీరు ఉప్పొంగి ప్రవహిస్తున్నందున అప్రమత్తంగా ఉండాలని మంత్రి ప్రజలకు సూచించారు.