Breaking News

మేయర్లు, ఎమ్మెల్యేలతో కేసీఆర్‌ కీలక సమీక్ష


తెలంగాణలో చిన్నపాటి ఎన్నికల సందడి మొదలవుతోంది. జీహెచ్ఎంసీ ఎన్నికలతో‌ పాటు పట్టభద్రుల కోటాలో రెండు ఎమ్మెల్సీ స్థానాలకు ఎన్నిక జరగాల్సి ఉంది. వీటి నిర్వహణకు ఎన్నికల సంఘం కసరత్తులు చేస్తోంది. మరోవైపు, జీహెచ్‌ఎంసీ ఎన్నికలను అత్యంత ప్రతిష్ఠాత్మకంగా తీసుకున్న అధికార టీఆర్‌ఎస్‌ పార్టీ ఆ దిశగా వ్యూహాలు రచిస్తోంది. టీఆర్‌ఎస్‌ వర్కింగ్‌ ప్రెసిడెంట్‌గా మంత్రి కేటీఆర్‌ పార్టీ బాధ్యతలు స్వీకరించిన అనంతరం జరుగుతున్న తొలి ఎన్నికలు ఇవి. దీనిలో భాగంగానే ఇప్పటికే రంగంలోకి దిగిన కేటీఆర్‌ గ్రేటర్‌ పరిధిలోని పార్టీ ఎమ్మెల్యేలు, ఎంపీలు, మంత్రులతో విడతల వారిగా సమీక్షలు నిర్వహించారు. ఈ క్రమంలోనే ముఖ్యమంత్రి కేసీఆర్‌ గురువారం పార్టీ ఎమ్మెల్యేలు, మేయర్లతో సమావేశం అయ్యారు.

మున్సిపల్ కార్పొరేషన్ పరిధిలోని ఎమ్మెల్యేలు, మేయర్లతో సీఎం కేసీఆర్ గురువారం భేటీ అయ్యారు. ఎన్నికల వ్యూహాలతో పాటు అభ్యర్థల ఎంపికలపై తీసుకువాల్సిన జాగ్రత్తలపై సూచనలు, సలహాలు ఇచ్చారు. హైదరాబాద్‌, రంగారెడ్డి, మహబూబ్‌‌ నగర్‌ స్థానం నుంచి మేయర్‌ బొంతు రామ్మోహన్‌ను బరిలో నిలిపేందుకు పార్టీ అధిష్ఠానం ప్రయత్నం చేస్తున్నట్లు చర్చసాగుతోంది. పట్టభద్రుల కోటా ఎన్నికలో తీవ్ర పోటీ ఉండటం, ప్రభుత్వంపై వ్యతిరేకత, ఉద్యోగుల్లో నిరాశ విపక్షాలకు లబ్ధి చేకూర్చే అవకాశం ఉంది.

ఈ క్రమంలో ఉద్యమ కాలంలో ఉస్మానియా యూనివర్సిటీతో సత్సంబంధాలు, స్థానిక యువతలో మంచి ఫాలోయింగ్‌ ఉన్న రామ్మోహన్‌ను బరిలో నిలిపితే అనుకూల ఫలితాలు వస్తాయని సీఎం భావిస్తున్నట్లు తెలుస్తోంది. మాజీ ఎమ్మెల్యే సోలిపేట రామలింగారెడ్డి మరణంతో ఖాళీ అయిన దుబ్బాక ఉప ఎన్నికపైనా కూడా సీఎం ఈ సమావేశంలో చర్చించే అవకాశం ఉంది.