Breaking News

దుర్గం చెరువుపై నిర్మించిన కేబుల్‌ బ్రిడ్జిని ప్రారంభించిన రాష్ట్ర పురపాలక, ఐటీశాఖ మంత్రి కేటీఆర్


హైదరాబాద్‌లోని మాదాపూర్ వద్ద ఉన్న దుర్గం చెరువుపై నిర్మించిన కేబుల్‌ బ్రిడ్జిని రాష్ట్ర పురపాలక, ఐటీశాఖ మంత్రి కేటీఆర్ శుక్రవారం సాయంత్రం ప్రారంభించారు. దీన్ని హైదరాబాద్‌ నగరవాసులకు కేటీఆర్ అంకితమిచ్చారు. ఈ కార్యక్రమానికి కేంద్ర మంతి కిషన్‌ రెడ్డి, రాష్ట్ర మంత్రులు తలసాని శ్రీనివాస్‌యాదవ్‌, సబితా ఇంద్రారెడ్డి, శ్రీనివాస్‌గౌడ్‌, జీహెచ్‌ఎంసీ మేయర్‌ బొంతు రామ్మోహన్‌, ఎంపీ రంజిత్‌రెడ్డి తదితరులు హాజరయ్యారు. తెలంగాణ ప్రభుత్వం ఈ చెరువుపై అత్యంత ప్రతిష్ఠాత్మకంగా రూ.184 కోట్ల ఖర్చుతో వంతెనను నిర్మించిన సంగతి తెలిసిందే. అయితే, గత కొద్ది నెలలుగా వాయిదాలు పడుతూ వస్తున్న దీని ప్రారంభ కార్యక్రమం శుక్రవారం ఎట్టకేలకు జరిగింది.

వ్యూహాత్మక రహదారి అభివృద్ధి (ఎస్సార్‌డీపీ) పథకంలో భాగంగా జీహెచ్‌ఎంసీ ఈ తీగల వంతెన నిర్మాణం చేపట్టింది. 21వ శతాబ్దపు ఇంజినీరింగ్‌ అద్భుతంగా దీన్ని అధికారులు పేర్కొంటున్నారు. 754.38 మీటర్ల పొడవైన ఈ బ్రిడ్జితో మాదాపూర్‌, జూబ్లీహిల్స్‌ల మధ్య దూరం బాగా తగ్గనుంది. రోడ్‌ నంబర్‌ 36, జూబ్లీహిల్స్‌, మాదాపూర్‌లో ట్రాఫిక్ సమస్య నుంచి వాహనదారులకు ఊరట లభిస్తుంది.

అంతేకాక, మంత్రి కేటీఆర్ జూబ్లీహిల్స్‌ రోడ్‌ నంబర్‌ 45 ఎలివేటెడ్‌ కారిడార్‌ను ప్రారంభించారు. దుర్గం చెరువు కేబుల్ బ్రిడ్జి జూబ్లీహిల్స్ రోడ్ నెంబర్ 45ను కలుపుతూ ఈ ఫ్లై ఓవర్‌ను నిర్మించారు. ఈ ఫ్లై ఓవర్‌‌కు పెద్దమ్మతల్లి ఎక్స్‌ప్రెస్‌వేగా నామకరణం చేశారు.

ప్రతిష్టాత్మకమైన ఇంజినీరింగ్‌ పరంగా అత్యంత సవాల్‌తో కూడిన తీగల ఆధారిత వంతెనను దుర్గం చెరువు సరస్సుపై లార్సన్‌ అండ్‌ టౌబ్రో నిర్మించింది. ‘‘ఈ వంతెనలో వినూత్నమైన అంశం ఏమిటంటే, తీగల వంతెనలలో కాంక్రీట్‌ లో ప్రపంచంలోనే అతిపొడవైన ప్రీకాస్ట్‌ సెగ్మంటల్‌ స్పాన్‌ 233.85 మీటర్ల స్పాన్‌ ఉండటం’’అని ఎల్ అండ్ టీ హోల్‌ టైమ్‌ డైరెక్టర్‌ అండ్‌ సీనియర్‌ ఎగ్జిక్యూటివ్‌ వైస్‌ ప్రెసిడెంట్‌ ఎస్‌ వీ దేశాయ్ అన్నారు. ‘‘అత్యంత సవాల్‌తో కూడిన పరిస్థితులు, విభిన్నమైన భౌగోళిక పరిస్థితులు నడుమ ఈ ప్రాజెక్టును మేం నిర్మించాం. ఈ తీగల ఆధారిత వంతెన నిర్మాణంలో మొత్తంమ్మీద 428 మెట్రిక్‌ టన్నుల అత్యధిక తన్యత కలిగిన స్ట్రాండ్‌, 26,600 క్యూబిక్‌ మీటర్ల కాంక్రీట్‌, 4800 మెట్రిక్‌ టన్నుల స్టీల్‌, 287 మెట్రిక్‌ టన్నుల అనుసంధానిత తీగలను ఉపయోగించాం. కరోనా మహమ్మారి విజృంభిస్తున్న ఈ సమయంలో కూడా సమయానికి ఈ ప్రాజెక్టును పూర్తి చేయడం పట్ల మేము చాలా సంతోషంగా ఉన్నాం’’ అని ఆయన అన్నారు.