Breaking News

తెలంగాణ డిగ్రీ, పీజీ పరీక్షలకు తుది నిర్ణయం : త్వరలో పరీక్షలు


తెలంగాణ  రాష్ట్రంలో డిగ్రీ, పీజీ చివరి సెమిస్టర్‌ పరీక్షలపై నెలకొన్న అయోమయం తొలగిపోయింది. కరోనా వైరస్‌ వ్యాప్తి కారణంగా వాయిదా పడిన చివరి సెమిస్టర్‌ పరీక్షలు ఏ విధంగా నిర్వహించాలనేది ప్రభుత్వ విధానపరమైన నిర్ణయమని.. అందులో జోక్యం చేసుకోలేమని హైకోర్టు స్పష్టం చేసింది. పరీక్షలను ఎప్పటిలాగే రాతపరీక్ష నిర్వహిస్తామని ప్రభుత్వం హైకోర్టుకు వివరించింది.

ఇక అటానమస్‌ కాలేజీలు వారికి అనుకూలమైన విధానంలో పరీక్షలు నిర్వహించుకోవచ్చని సూచించింది. సప్లిమెంటరీలో ఉత్తీర్ణులైన వారిని రెగ్యులర్‌గా పాసైనట్టు పరిగణిస్తామని స్పష్టం చేసింది. అయితే.. సప్లిమెంటరీ పరీక్షలు ఎప్పుడు ఉంటాయో స్పష్టత ఇస్తే.. విద్యార్థులు దానికి అనుగుణంగా ప్రణాళిక సిద్ధం చేసుకుంటారని ఎన్‌ఎస్‌యూఐ తరఫు న్యాయవాది దామోదర్‌ రెడ్డి కోరారు.దీనిపై పరీక్షలు ఎప్పుడు నిర్వహించాలనేది ఆయా శాఖలు నిర్ణయిస్తాయని.. దానిపై ఇప్పుడే హామీ ఇవ్వలేమని అడ్వొకేట్‌ జనరల్‌(ఏజీ) బీఎస్‌ ప్రసాద్‌ తెలిపారు. దీనిపై వివరణ ఇచ్చిన జేఎన్‌టీయూహెచ్‌.. రెండు నెలల్లోపు సప్లిమెంటరీ పరీక్షలు నిర్వహిస్తామని స్పష్టం చేసింది. పరీక్షలను కరోనా జాగ్రత్తలో నిర్వహించాలని హైకోర్టు ప్రభుత్వాన్ని ఆదేశించింది. అనంతరం పిటిషన్లపై విచారణ ముగిస్తున్నట్లు ధర్మాసనం ప్రకటించింది.

దీంతో పరీక్షల నిర్వహణకు యూనివర్సిటీలు సిద్ధమవుతున్నాయి. ఈ క్రమంలో ఈనెల 16 నుంచి జేఎన్‌టీయూహెచ్‌.. 17 నుంచి ఉస్మానియా యూనివర్సిటీల పరిధిలోని వివిధ పరీక్షలు ప్రారంభం కానున్నాయి.