Breaking News

దుర్గం చెరువు తీగల వంతెనపైకి సందర్శకులను అనుమతి


హైదరాబాద్‌లో ఇటీవల ప్రారంభించిన తీగల వంతెనపైకి సందర్శకులను అనుమతించనున్నారు. ఈ కేబుల్‌ బ్రిడ్జిని మంత్రి కేటీఆర్ శుక్రవారం సాయంత్రం ప్రారంభించిన సంగతి తెలిసిందే. ఈ కట్టడంతో దుర్గం చెరువు ప్రాంతం పర్యటకంగా మరింతగా అభివృద్ధి చెందనుంది. అయితే, ఈ వంతెనపై ఆదివారం ఓ ప్రత్యేక కార్యక్రమాన్ని నిర్వహించనున్నారు. దీనికి సందర్శకులను కూడా అనుమతించనున్నారు. కేబుల్‌ బ్రిడ్జిపై ఆదివారం సాయంత్రం 5.30 గంటలకు భారతీయ ఆర్మీ ఆధ్వర్యంలో సింఫోనీ బ్యాండ్‌ కార్యక్రమాన్ని ఏర్పాటు చేశారు. ఈ లైవ్‌ బ్యాండ్‌ ప్రదర్శనలో ప్రజలు ఉత్సాహంగా పాల్గొనాలని నిర్వహకులు పిలుపునిచ్చారు.

చైనాతో సరిహద్దు పంచుకుంటున్న నార్తన్‌ బోర్డర్‌లో విధులు నిర్వహిస్తున్న భారతీయ సైనికులు, జీహెచ్‌ఎంసీ పారిశుద్ధ్య విభాగంలో పని చేసే కరోనా వారియర్ల సేవలకు సంఘీభావంగా ఈ బ్యాండ్‌ ప్రదర్శన ఏర్పాటు చేశారు. ఆదివారం సాయంత్రం ఈ ప్రదర్శన మొదలు కానుంది. 45 నిమిషాల పాటు కొనసాగే ఈ కార్యక్రమానికి ప్రవేశం ఉచితం.

ఇకపై ప్రతి ఆదివారం కేబుల్‌ బ్రిడ్జిపైకి సందర్శకులను అనుమతిస్తామని జీహెచ్ఎంసీ అధికారులు వెల్లడించారు. దుర్గం చెరువుపై నిర్మించిన ఈ తీగల వంతెన దేశంలోనే అతిపెద్ద కేబుల్‌ బ్రిడ్జిగా పేరుపొందింది. ఎల్‌ఈడీ విద్యుద్దీపాల వెలుగుల్లో వంతెన మరింత అందం సంతరించుకుంది.