Breaking News

ఆదాయానికి మించి ఆస్తుల కేసులో ఏసీపీ నరసింహ రెడ్డిని అరెస్ట్


ఆదాయానికి మించి ఆస్తుల కేసులో మల్కాజ్ గిరి ఏసీపీ నరసింహ రెడ్డిని ఏసీబీ అధికారులు అరెస్ట్ చేశారు. ఇప్పటివరకు రూ.7.5 కోట్ల ఆస్తులను ఏసీబీ అధికారులు గుర్తించారు. మార్కెట్ విలువ ప్రకారం ఇది రూ.75 కోట్లు ఉండవచ్చని అధికారులు అంచనా వేస్తున్నారు. నాలుగు జిల్లాల్లో 25 ప్రాంతాల్లో ఏకకాలంలో ఏసీబీ అధికారులు దాడులు చేశారు. స్వస్థలం అనంతపూర్‌లో 55 ఎకరాల వ్యవసాయ భూమి కూడా ఉన్నట్లుగా అధికారులు గుర్తించారు. సైబర్ టవర్స్, మాదాపూర్ వద్ద 4 ప్లాట్లు కూడా ఉన్నట్లు గుర్తించారు. హఫీజ్‌పేట్ వద్ద జీ+3 భవనం, 2 ఇళ్ళు, 15 లక్షల నగదు బ్యాలెన్స్, 2 బ్యాంక్ లాకర్స్‌ను గుర్తించారు.

రియల్ ఎస్టేట్, ఇతర వ్యాపారాలలో పెట్టుబడులు పెట్టినట్లు పత్రాలను కూడా అధికారులు స్వాధీనం చేసుకున్నారు. ఇంకా సోదాలు
కొనసాగుతున్నాయి. భూతగాదాలు, ఆదాయానికి మించి ఆస్తులు కేసులో ఏసీబీ అధికారులు విచారణ చేస్తున్నారు. హైదరాబాద్ తో పాటు వరంగల్, కరీంనగర్ , నల్గొండ, అనంతపూర్‌లో సోదాలు చేస్తున్నారు. నరసింహారెడ్డి గతంలో ఉప్పల్‌ సీఐగా పనిచేశారు. స్పెషల్‌ పార్టీలో పనిచేస్తున్న సమయంలో నార్సింగ్‌ పోలీస్‌ స్టేషన్‌ పరిధిలో పేరుమోసిన గొలుసుదొంగ శివను ఎన్‌కౌంటర్‌ చేసిన బృందంలో ఆయన కూడా ఉన్నారు. పలు భూవివాదాల్లో తలదూర్చి రాజీ చేసినట్టు నరసింహారెడ్డిపై ఆరోపణలు ఉన్నాయి. దీంతో ఏసీపీ పై వచ్చిన ఫిర్యాదులు, ఆరోపణలపై పూర్తి స్థాయిలో విచారణ చేస్తున్నారు.

ఆదాయానికి మించి ఆస్తులు కలిగియున్నారనే అభియోగలుపై ఏసీబీ అధికారులు కేసు నమోదు చేసి దాడులు చేశారు. సికింద్రాబాద్ మహేంద్ర హిల్స్ లోని నరసింహ రెడ్డి ఇంట్లో డిప్యూటీ డైరెక్టర్ స్థాయి అధికారి టీమ్ దాడుల్లో పాల్కొంది. రాత్రి వరకు సోదాలు చేసిన అధికారులు సుమారు అప్పటికి రూ.10 కోట్ల ఆస్తులను గుర్తించారు.

అతని ఇంటితో పాటు జగిత్యాల గంగాధరం ఎంపీపీ శ్రీరామ్ మధుకర్ ఇంట్లో మరొక టీమ్ సోదాలు నిర్వహించింది. ఏసీపీ నరసింహ రెడ్డికి శ్రీరామ్ మధుకర్‌కి మధ్య సంబంధాలపై ఏసీబీ ఆరా తీసింది. ఓ ప్రజా ప్రతినిధికి పోలీస్ అధికారి ఉన్న లింకులపై విచారణ చేసిన ఏసీబీ చివరకు ల్యాండ్‌కి సంబంధించిన లావాదేవీలు ఉన్నట్లుగా గుర్తించారు. భూ వివాదాల వ్యవహారంలోనే రైడ్స్ జరుగుతున్నట్టు తెలిసింది.

25 ప్రాంతాల్లో సోదాలు నిర్వహించడం అనేక అనుమానాలకు తావిస్తోంది. ఈ ప్రాంతాలన్నీ నరసింహ రెడ్డి బందువుల, బినామీలవేనా అనేది తేలాల్సి ఉంది. ఇంకా సోదాలు కొనసాగుతున్న నేపథ్యంలో ఏసీబీ నరసింహ రెడ్డి ఆస్తుల విలువ మరింత పెరిగే అవకాశం ఉంది. ఇంకా బ్యాంకు లాకర్లపై కూడా దృష్టి సారించాల్సి ఉంది.