Breaking News

సైబర్ నేరాలకు పాల్పడుతున్న ముఠాను నల్గొండ పోలీసులు శనివారం అరెస్టు


పోలీస్ అధికారులు లక్ష్యంగా సైబర్ నేరాలకు పాల్పడుతున్న ముఠాను నల్గొండ పోలీసులు శనివారం అరెస్టు చేశారు. ఈ వ్యవహారం ఇటీవల దేశ వ్యాప్తంగా సంచలనం సృష్టించిన సంగతి తెలిసిందే. చివరికి నల్గొండ ఎస్పీ పేరుతో నకిలీ ఫేస్‌బుక్ ఖాతా తెరిచి ఆయన పేరుతోనూ ఈ ముఠా డబ్బుల వసూళ్లకు పాల్పడ్డారు. రాజస్థాన్‌లోని భరత్ పూర్ జిల్లా కేత్వాడ మండల కేంద్రానికి చెందిన ముస్తఖీమ్ ఖాన్, మనీష్, షాహిద్, సద్దాం ఖాన్‌లను అరెస్ట్ చేసినట్లు పోలీసులు శనివారం తెలిపారు. ఈ మేరకు నల్గొండలో వీరు విలేకరుల సమావేశం నిర్వహించారు.

వీరంతా రోడ్లపై వెళ్లే వారిని బెదిరించి డబ్బులు గుంజేవారని, ఓఎల్‌ఎక్స్‌ వేదికగా కూడా అక్రమాలకు పాల్పడ్డట్లు వెల్లడించారు. గూగుల్ పే, ఫోన్ పేల ద్వారా డబ్బులు ట్రాన్స్ ఫర్ చేయించుకోవడం లాంటి సైబర్ మోసాలకు పాల్పడే వారని తెలిపారు.

దక్షిణాది రాష్ట్రాలకు చెందిన పోలీస్ అధికారుల ఫేస్ బుక్ అకౌంట్లను ఫేక్‌గా క్రియేట్ చేసి వారి పేరుతో వారి స్నేహితుల జాబితాలో ఉన్న వారికి ఫ్రెండ్ రిక్వెస్ట్ పంపించడం వంటివి చేశారని వెల్లడించారు. కొందరిని మెసెంజర్ ద్వారా మెసేజ్‌లు పంపి డబ్బులు ఫోన్ పే ద్వారా పంపించమనే వారని వివరించారు. ఇందులో తెలంగాణకు చెందిన 81 మంది పోలీస్ అధికారుల పేరుతో నకిలీ ఫేస్‌బుక్ అకౌంట్లు సృష్టించారని డీఐజీ రంగనాథ్ తెలిపారు. వీరిని పట్టుకోవడానికి తాము చాలా శ్రమించాల్సి వచ్చిందని అయినప్పటికీ ఏ మాత్రం వెనకడుగు వేయకుండా తెలంగాణ పోలీసుల ప్రతిష్ట నిలిపే విధంగా సమర్థంగా వ్యవహరించి తాము రాజస్థాన్ వరకూ నిందితుల కోసం వెళ్లామని అన్నారు.