Breaking News

దుబ్బాక బీజేపీ ఎమ్మెల్యే అభ్యర్థిగా రఘునందన్ రావు


తెలంగాణ రాష్ట్ర సమితి (టీఆర్ఎస్) ఎమ్మెల్యే సోలిపేట రామలింగారెడ్డి మరణంతో ఏర్పడ్డ ఖాళీ అయిన దుబ్బాక అసెంబ్లీ స్థానానికి త్వరలో ఎన్నికలు జరగబోతున్నాయి. సాధారణంగా ఎమ్మెల్యే మృతి చెందితే ఆయన కుటుంబ సభ్యులను ఏకగ్రీవంగా ఎన్నుకునే సంప్రదాయం తెలుగు రాష్ట్రాల్లో ఉంది. అయితే ఈసారి దుబ్బాక అసెంబ్లీ స్థానంలో రాజకీయ పార్టీలన్నీ ఎన్నికల బరిలో దిగేందుకు నిర్ణయించాయి. దీంతో దుబ్బాక అసెంబ్లీ స్థానానికి ఎన్నిక అనివార్యమైంది.

తాజాగా, దుబ్బాక అసెంబ్లీ స్థానానికి భారతీయ జనతా పార్టీ (బీజేపీ) తన అభ్యర్థిని ప్రకటించింది. అందరూ ఊహించినట్లుగానే బీజేపీ అధికార ప్రతినిధి రఘునందన్ రావు ఎమ్మెల్యే అభ్యర్థిగా బరిలో దిగబోతున్నారు. ఇప్పటికే దుబ్బాక అసెంబ్లీ స్థానం నుంచి 2014, 2018 ఎన్నికల బరిలో నిలిచిన రఘునందన్ రావు.. మూడో స్థానంతో సరిపెట్టుకోవాల్సి వచ్చింది. అయితే ఈ సారి ఎట్టి పరిస్థితుల్లోనూ ఎమ్మెల్యేగా అసెంబ్లీలోకి అడుగు పెట్టాలని గట్టిగా ప్రయత్నిస్తున్నారు. 2001లో టీఆర్ఎస్ పార్టీ ద్వారా రాజకీయ అరంగేట్రం చేసిన రఘునందన్ రావు.. ఎన్నిసార్లు ఎన్నికల్లో పోటీ చేసినా ఓటమిపాలవుతూ వస్తున్నారు. అయితే గత కొన్నాళ్లుగా టీవీ డిబేట్లతో మంచి పాపులారిటీ సంపాదించుకున్న రఘునందన్.. ఈసారి ఎలాగైనా గెలవాన్న కసితో బరిలో దిగబోతున్నారు.

ఇటు అధికార టీఆర్ఎస్ సైతం దుబ్బాక ఎన్నికను ప్రతిష్టాత్మకంగా తీసుకుంది. ఏకంగా ముఖ్యమంత్రి కేసీఆర్ సైతం ఈ స్థానంపై ప్రత్యేకంగా దృష్టిసారించారు. దుబ్బాక ఉప ఎన్నికలోనూ టీఆర్‌ఎస్‌ విజయం ఖాయమని ముఖ్యమంత్రి కేసీఆర్ ధీమా వ్యక్తంచేశారు. టీఆర్‌ఎస్‌ గ్రామస్థాయి వరకూ నెట్‌వర్క్‌ కలిగి ఉందని, అందువల్లే టీఆర్‌ఎస్‌ విజయం ఖాయమన్నారు.

ఇక, కాంగ్రెస్ పార్టీ సైతం దుబ్బాకలో సత్తా చాటాలని భావిస్తోంది. సోమవారం లోపు దుబ్బాక అభ్యర్థిని ఖరారు చేస్తామని తెలంగాణ పీసీసీ చీఫ్‌ ఉత్తమ్‌కుమార్‌రెడ్డి వెల్లడించారు. ప్రతి కాంగ్రెస్ కార్యకర్తకు దుబ్బాక ఉపఎన్నిక బాధ్యతలు అప్పగిస్తున్నామని, 8వ తేదీ లోపు నాయకులు, కార్యకర్తలకు అప్పగించిన గ్రామాల్లో ఉండాలని ఆదేశించారు.