Breaking News

కేంద్ర ప్రభుత్వానికి సీఎం కేసీఆర్ ఘాటైన లేఖ


ఏపీ, తెలంగాణ జలవివాదంపై కేంద్ర ప్రభుత్వానికి సీఎం కేసీఆర్ ఘాటైన లేఖ రాశారు. ఇరు రాష్ట్రాల మధ్య నీటి కేటాయింపులో విషయంలో అన్యాయం జరిగిందని, ఇందుకోసం తెలంగాణ గత 60 ఏళ్ల నుంచి పోరాటం చేసిందని గుర్తు చేశారు. కొత్తగా రాష్ట్రం ఏర్పాటైన ఏడేళ్ల తర్వాత కూడా తమకు న్యాయంగా రావాల్సిన వాటా దక్కడం లేదని పేర్కొన్నారు. కేంద్ర ప్రభుత్వ నిర్లక్ష్యమే ఇందుకు కారణమని.. ఇలా చెప్పాల్సి రావడం దురదృష్టకరమని పేర్కొన్నారు. కేంద్ర జల్‌శక్తి మంత్రికి శుక్రవారం ముఖ్యమంత్రి కేసీఆర్ 15 పేజీల లేఖను రాశారు. అంతర్‌రాష్ట్ర నదీ జలాల వివాద చట్టం కింద తెలంగాణ చేసిన ఫిర్యాదును ఏడేళ్లుగా ట్రైబ్యునల్‌కు నివేదించకుండా కేంద్రం తాత్సారం చేసిందని ఆరోపించారు. కేంద్రం వైఖరి ఏపీ తెలంగాణ వివాదాలకు ఆజ్యం పోసిందని ఆరోపించారు. ‘‘ఆంధ్రప్రదేశ్‌ అనధికారికంగా చేపట్టిన పోతిరెడ్డిపాడు హెడ్‌రెగ్యులేటర్‌ విస్తరణ వల్ల తెలంగాణ ప్రయోజనాలకు తీవ్ర విఘాతం కలుగుతుంది. కృష్ణా బోర్డు పర్యవేక్షణ లేమి ఉంది. ఏపీ పునర్విభజన చట్టంలోని సెక్షన్‌-89కి సంబంధించిన అంశాలను కూడా ఈ నెల 6న జరిగే అపెక్స్‌ కౌన్సిల్‌ ఎజెండాలో చేర్చాలి. గోదావరిపై తెలంగాణలో నిర్మాణంలో ఉన్న ప్రాజెక్టుల విషయంలో ఏపీ అభ్యంతరాలు, గోదావరి జలాల వినియోగం అంశాన్ని కూడా ఎజెండాలో చేర్చాలి. ఏపీ చేపట్టే రాయలసీమ ఎత్తిపోతల పథకాన్ని, పోతిరెడ్డిపాడు విస్తరణను నిలిపివేయాలి. అంతేకాక, శ్రీశైలం ప్రాజెక్టు నిర్వహణను తెలంగాణకు అప్పగించాలి.’’ అని కేసీఆర్ కోరారు.